حقى برقبتى

حقى برقبتى جمله بنسمعها دايما..... بس ايه هو معناها؟

من وجهة نظرى ان ال له حق المفروض مايفرطش فيه

واللى مزعلنى ان احنا فى مصر دايما مفرطيين فى حقنا وده طبعا لعدة اسباب

السبب الاول الخوف او بمعنى ادق الجبن على راى المثل (عيش جبان تموت مستور)

السبب التانى الرياء وده بقى مصيبة المصايب ونقول (اللى نعرفه احسن من اللى منعرفوش)

السبب الثالث افتراض سوء النيه وده اعظمهم (لأن المتهم حتى تثبت ادانته هو متهم)

وطبعا اذا انته ليك حق وتسيبه ماتدورش عليه يبقى ده معناه انك سلبى والسلبيه اصبحت سمه من سمات المصريين و من الصعب التخلى عنها زى عادة التدخين قليل من يتخلى عنها

ولاننا مدمنين سلبيه وتدخين مافيش مانع نحرق نفسنا ونقول هنعمل ايه يعنى . احنا بايدينا ايه نعمله . واصبحت مصر كلها بتقول وانا مالى خلينى ياعم اربى عيالى

ونسينا كلنا ان البحث عن الحق وعدم تركه للغير حتى ولو وصل لحد الموت هو شهاده فى سبيله وده هو معنى الجمله حقى برقبتى يعنى ياحقى ياتطير رقبتى فى سبيله

وده مش معناه ان كل واحد يرفع السيف فى وش الاخر ولكن اجدادنا قالو ماضاع حق وراؤه مطالب .... وادينا كلنا شايفين ان كل منصب من المناصب المهمه فى البلد بقت بالكوسه وبالرياء والنفاق لحد ماأصبح كل من يعتلى منصبا غير مؤهل ليه ويلا اهى ماشيه .. ماشيه ازاى.... مهلبيه يعنى !

سمك لبن تمر هندى كل ده تضربه فى بعضه يديك تركيبه من اللى موجوده دلوقتى

مدير عام فى مكان لايعرف فن الاداره او وزير فى وزاره كل اللى يعرفه ازاى يأمن مستقبله ومستقبل اولاده .. رئيس وزاره جاب السمك واللبن و التمر الهندى وخلطهم ببعض وفى النهايه عرض الوصفه على كبير الطباخين اللى بارك الوصفه وقال ليس فى الأمكان احسن مما كان واهه الكل بيطبخ طبيخ مسلوق وبيأكلوه للشعب المريض الراضى القابع خلف جدران الفقر والسلبيه والنفاق شعب راضى لنفسه المهانه والاستهانه وعمره ماادور على حقه وقال فين الملايين اللى اتسرقت او قال ليه الناس بتموت فى الشوارع من الجوع والبرد ... انا بقترح ان الشعب يقوم بعمل مسيره صامته

ليه مايقومش قومه سلميه بدون صياح ويمشوا فى الشوارع احتجاجا على الاوضاع وأكرر تانى بدون كلام لان الصمت ابلغ من الكلام عشان يعرف كل واحد فى اى منصب ان حتى الكلام خلص ولم يعد لدينا مانعطيه لقد اخذو كل شى حتى المطالبه بالحقوق بقت حق مسلوب. ويادوب سايبين لينا المر مالى الكوب .

حتى العضم خادوه مش سايبين ولا عرقوب

انتوبقى اتفرجتو على فيلم ادونى حقى ياولاد المركوب؟